Yaqinda nihoyasiga yetgan Yevro-2024 turnirida minglab muxlislar over-taymlarni kutib turgan pallada Olli Uotkins Angliyani va ularni ortiqcha ovoragarchilikdan qutqardi.

Yarim finalning tugashiga 10 daqiqa qolganida Garri Keyn o‘rniga tushgan «Aston Villa» hujumchisi g‘alaba golini uradi: Koul Palmer uzatmasini qabul qilishga chopdi, de Vrey qarshiligini gavdasi bilan sindirdi, darvoza tomon qayrildi va olis burchakni nishonga oldi. Go‘yo Olli ssenariyni bilganga o‘xshardi, ehtimol, shundaydir!

O‘yindan keyin Uotkins tan oldi: «O‘zim va farzandim hayoti bilan ont ichib aytamanki, maydonga tushayotganda Koulga shunday degandim: bugun yonma-yon o‘ynaymiz, sen to‘pni menga uzatasan. U to‘pni egallagach, uzatmani qabul qilish tadorikini ko‘rdim. U yog‘iga to‘pni egallash va hujumni yakunlash qolgandi». Olli uzoq kutgan imkoniyatga ega bo‘ldi: «Yaqinda nimadandir ko‘nglim g‘ash ekanligini sezib qoldim. Zaxirada o‘tirishni yoqtirmayman. Do‘stlarim doim dalda berishadi: «Sabr qil, imkoniyat bo‘ladi, o‘ta muhim gollar urganingni o‘zing ham bilmay qolasan!» Finalda shunday bo‘lishidan umidvorman». To‘g‘ri, final Olli orzu qilganidek bo‘lmadi. Lekin Olli Garet Sautgeytni risarlik unvoniga ancha yaqinlashtirdi.

Endi Uotkinsga oid 20ta fakt bilan tanishamiz:

1. Uotkins Agata Kristidek mashhur adiba tug‘ilgan shaharda dunyoga kelgan. Torki nomli shaharni eshitmaganmisiz? Hechqisi yo‘q. Vaholanki, u yerda «Torki Yunayted» klubi va buyuk Benksi asarlari bor.

2. Uotkins - «Ekseter» klubi tarbiyalanuvchisi: bolaligidan faqat shu jamoaga intilgan, 9 yoshida imtihondan o‘ta olmagan. «U juda nimjon va tayyormasdek ko‘ringandi. Biroq biz uni qo‘yib yubormadik va muddat berdik. Ikki yildan keyin qabul qildik», - deydi akademiya murabbiyi.

3. Olli 4-divizion klubiga «Ueston-syuper-Mer» klubidagi ijaradan keyin o‘tgandi. Bu jamoani ham bilmasligingiz qo‘rqinchli emas - u 6-liga jamoasi. «O‘shanda men Angliya terma jamoasi safida Yevroda to‘p surishni xayolimga ham keltirmagandim. Orzuga ayb yo‘q, lekin realist bo‘lish yaxshiroq. U davrda men «Ekseter»ning asosiy tarkibida o‘ynashni orzu qilardim, qachondir Angliya uchun gol urish esa men uchun ulkan baxt edi», - dedi Uotkins «uch sherlar»ni finalga olib chiqqan goldan keyin.

4. 2017 yilda 21ga chiqqan Olli hamon 4-divizionda «Ekseter» sharafini himoya qilardi. O‘shanda u 3ta professional ligalar ichidagi eng yaxshi yosh o‘yinchi unvoniga loyiq topilgandi. O‘sha yil yozida uni «Brentford» o‘z safiga jalb etdi.

5. Uotkinsning «Brentfordi» mergan hujumchilar uchligi ko‘magida Chempionshipning sermahsul jamoasiga aylandi. Mope-Uotkins-Benrahma triosi 2018|19 yillar mavsumida 51ta gol urdi. Mope ketgach, uning o‘rnini egallagan Mbeumo bilan gollar soni yanada oshdi - 59ta. Ollining o‘zi 28ta gol urdi.

6. 2019|20 yillar mavsumida Uotkins «Aston Villa»ga o‘tdi. To‘purar uchun «Brentford» 34 mln. yevro oldi. Klub rekordi hanuzgacha barhayot. «Ekseter» esa o‘z tarixidagi eng yirik daromad - 5 mln.ga ega bo‘ldi. Olli bir kunda 2ta klubni rekordchiga aylantirdi.

7. Uotkinsni qo‘lga kiritish «Villa» uchun oson kechmadi: «Brentford» bir vaqtning o‘zida APLning 6 klubiga rad etdi. «Villa» esa ulardan qimmatroq bahoni taklif etdi. Klub prezentasiyasini Olli bilan «Brentford»da birga ishlagan Din Smit olib borganligi hujumchiga ma’qul bo‘ldi.

8. Olli - APL so‘nggi mavsumidagi eng yaxshi (13) assistent, sermahsullik bobida (19}13) ligada ikkinchi bo‘ldi. Undan yuqoriroq natija (33) Palmerga tegishli.

9. Olli - «Fentezi-futbol» yulduzlaridan biri. U ochkolar bo‘yicha uzoq vaqt peshqadam maqomida yurib mavsum oxirida Palmer va Fodendan ortda qoldi. Lekin hujumchilar o‘rtasida 215 ochko bilan yetakchi bo‘ldi.

10. Uotkins 11 metrli jarima zarbalari yoqtirmaydi: APLda umuman tepmagan, ungacha - butun faoliyatida atigi 4ta gol. Hatto Aleksandar Mitrovich bilan Chempionship to‘purari unvoni uchun kurashganida ham, «nuqta»dan gol urishni istamagan.

11. «Villa»da Olli alohida murabbiydan tahsil oladi. Ustozi unga avval u bilan hamkorlik qilgan Edinson Kavani va Pyer-Emerik Obameyang o‘yinlaridan olingan chizgilarni ko‘rsatib, saboq beradi.

12. Uotkins maydonda Keynning teskarisi ekanligi va shu sababli u bilan yonma-yon to‘p surishini tan olgandi: «Garri o‘nlik kabi ortga chekinishni xush ko‘radi, men esa xuddi «Tottenxem»dagi Son kabi, uning uzatmalarini qabul qilish rejasini o‘ylab topaman».

13. Agar yozda uni ilib ketishmasa, Olli «Villa»da klub rekordini yangilashi mumkin: Gabriel Agbonlaxor APLda 74ta gol urgandi, Ollida 59ta. 2-o‘rindagi (60) Duayt York o‘rnini bo‘shatishiga shubha yo‘q.

14. Gollar bo‘yicha 2023 yilgi klub rekordini (21) Uotkins dekabrning so‘nggi kunida amalga oshirgan. Qaysi jamoa darvozasiga urganini bilasizmi? Qadrdon «Brentford» darvozasiga!

15. Olli «Arsenal» muxlisi ekanligini juda ko‘p takrorlagan, «Emireyts»da to‘p surish niyati ham yo‘q emasligini aytgandi. Qiziqish ikki taraflama, lekin hozircha, natija yo‘q.

16. Uotkins o‘ta xotirjam yigit, ba’zan xalal beradigan darajada. «Vulverxempton»ga qarshi o‘yinda Mett Doerti unga qo‘pollik qilgan bo‘lsada, u lom-mim demadi, hakamga shikoyat ham qilmadi: «Meni g‘azablantirish juda qiyin, sokinlikni xush ko‘raman»...

17. Olli uning oilasini haqorat qilishganiga chiday olmadi. Dekabrni oxirgi kunidagi o‘sha goldan keyin hujumchi darvoza ortida o‘tirgan muxlisga ishora qildi. Ma’lum bo‘lishicha, muxlis butun o‘yin davomida Ollining oilasini haqorat qilgan ekan. Bundan bexabar bo‘lgan sobiq jamoadoshlari va muxlislar undan xafa bo‘lishdi. «Men faqat bir kishiga javob qaytardim. U meni va oilamni tinmay haqorat qildi», - dedi futbolchi.

18. Uotkins o‘z ma’shuqasi bilan Teylor Svift fanatlari kuchidan foydalandi. May oyida ma’shuqa Teylor fanatlarini APLning mavsum o‘yinchisi unvoni uchun tanlovida hujumchiga ovoz berishga da’vat etdi. Bu foyda bermadi, lekin urinish inobatga olindi!

19. Olli ijtimoiy tarmoqlarni yomon ko‘radi: «Nosamimiy va bema’ni fikrlarni joylashni yoqtirmayman. Futbolchilar yomon o‘yindan keyin «Juda bo‘sh o‘ynadim, 3ta golli vaziyatni yo‘qqa chiqardim», deb yoza olmaydilar».

20. Uotkinsga shon-shuhrat umuman yoqmaydi. «Avvallari oziq-ovqatni supermarketdan o‘zim olib kelardim. «Villa»ga o‘tgach, do‘konga qatnashni to‘xtatdim. Doimo meni ko‘rgan kishilar nimalarnidir shivirlashardi. Keyin surat so‘raydigan bo‘lishdi. Uyga xomush qaytadigan bo‘lib qolgandim. Shundan keyin ma’shuqamga do‘konga bomasligimni aytdim».

Ayniqsa, Yevro-2024 yarim finalidagi g‘alaba golidan keyin do‘konga bormasliging to‘g‘ri bo‘ladi, Olli!

A.AHMEDOV tayyorladi