"Chelsi" bosh murabbiyi Enso Mareska jamoasining o‘yini haqida o‘z taassurotlari bilan o‘rtoqlashdi.
Yakshanba kuni londonliklar mavsumoldi so‘nggi o‘rtoqlik uchrashuvida “Inter” bilan durang o‘ynadi (1:1).
“Men juda xursandman, chunki jamoa to‘p bilan va to‘psiz o‘yinda yaxshilanib borayotganini ko‘rmoqdaman. Bugun biz yana olti yoki yettita aniq golli vaziyatlar yaratdik. Ha, biz faqat bitta gol urdik, ammo vaziyatlar yaratish muhim. Biz, albatta, kelajakda ko‘proq gol uramiz", - dedi Mareska.
18 avgust kuni “ko‘klar” APL 1-turi doirasida “Manchester Siti”ni qabul qiladi.
