Superligada 16-tur bahslari davom ettirildi. Olmaliqning OKMK jamoasi bu tur Samarqandda "Dinamo" mehmoni bo‘ldi va 2:3 hisobida imkoniyatni boy berdi. Bellashuvdan so‘ng jamoa bosh murabbiyi Mirjalol Qosimov matbuot anjumanida ishtirok etdi.
Ikki jamoa ham bugun g‘alaba uchun o‘ynadi. Muxlislar chiroyli va ko‘p golli vaziyatga ega bahsga guvoh bo‘lishdi. "Dinamo" jamoasiga ochko kerak edi va oxirigacha kurashib g‘alaba qozondi. Bu bilan ularni tabriklayman. Ikkinchi bo‘limda, oxirgi 20 daqiqada yarim himoyachilar ularda ham, bizda ham yo‘q edi. Bor e’tibor hujumga qaratildi. Bizda ham 2-3 ta imkoniyat bo‘ldi, ammo foydalana olmadik. Mag‘lubiyatga uchradik. Ikkinchi taymda zaxiradan tushgan futbolchilar kuchaytirishi kerak edi, ammo o‘xshamadi. Hayot davom etadi.
Mavsumni eng zo‘r o‘yinlaridan biri bo‘ldi. So‘nggi daqiqalarda g‘alaba qozonishni juda ham istagani uchun OKMK o‘yinni nazoratidan chiqarib yubormadimi?
Ikkinchi bo‘limda "Dinamo" yaxshi hujum amalga oshirdi. Chap qanot himoyachimiz katta xatoga yo‘l qo‘ydi. Undan yaxshi foydalanib ketdi raqib. Keyin g‘alaba uchun miya o‘chib qoldi. Bugun man ikki jamoada ham markazda yarim himoyachilarimizni ko‘rmadim. Kim ursa, o‘sha jamoa yutib ketadi deb o‘ylab turgan edim. Bundan avvalgi matbuot anjumanida ham aytib o‘tgan edim. Qayerda ishlashimdan qat’iy nazar, pul bor yo‘qligiga qaramay yaxshi natija qayd etishga harakat qilamiz. Muxlislar uchun o‘ynaymiz. Ular maydondagi jangdan zavqlanib ketishi kerak. E’tiborimizni xalqaro maydonga qaratganmiz. U yerda katta jamoalar bilan to‘qnash kelamiz. Ana shunda, futbolchilar o‘sadi. Xalqaro tajriba uchun bu kerak. Chempionatimiz va OCHLning havosi boshqacha. Unday musobaqa uchun inson mehnati bilan erishadi. Yaxshi mashg‘ulot o‘tkazish kerak. Har bir detalning ahamiyati katta.
OKMK bu yil chempionlik uchun asosiy da’vogarlardan biri. Imkoniyat qanday deb baholaysiz?
To‘ydan oldin nog‘ora chalib bo‘lmaydi. Nasib qilgani bo‘ladi. Bugun yaxshi niyatda kelgan edik. Yil davomida o‘yinlarimiz ko‘p. Kutilmagan voqealar bo‘lishi mumkin. Masalan, Sentoku zaxarlangani uchun bugun uchrashuvda ishtirok eta olmadi. Niyat qilamiz, chempionlikka harakat qilyapmiz. Elit ligada ishtirok etsak, nur ustiga a’lo nur.
Akrom Komilovning xolati qanday?
"Navbahor" bilan o‘yinda yo‘q joydan jarohat oldi. Tizzasidan lat yegan. Yaqin orada safga qaytmaydi.
