Superligada 14-turning qoldirilgan uchrashuvlari bo‘lib o‘tdi. «Nasaf» jamoasi bu tur safarda «Olimpik» bilan kuch sinashdi va 2:0 hisobida g‘alaba qozondi. Bellashuvdan so‘ng jamoa bosh murabbiyi Ro‘ziqul Berdiyev matbuot anjumanida ishtirok etdi.

— Birinchi bo‘limda juda ham qiynaldik. Raqib yaxshi himoyalangani uchun muammoga uchradik. Tezkor gol kiritib, vazifamizni osonlashtirmoqchi edik, ammo o‘xshamadi. Gol urganimizdan keyin raqib oldinga chiqdi va bizda imkoniyatlar paydo bo‘ldi. «Olimpik» yosh va tajribasiz bo‘lsa ham katta ishtiyoq bilan harakat qildi. Yigitlarga raqibni hurmat qilishni ta’kidlagan edik. Asosiysi g‘alabaga erishdik. Biz uchun 3 ochko zarur edi.

— Birinchi bo‘limni ikkita hujumchi bilan boshlab raqib darvozasiga birorta aniq zarba berilmaganini qanday izohlaysiz?
— Vazifasini yaxshi bajarmagani bilan bog‘liq. Ikkalasida ham birinchi bo‘limda vaziyat bo‘lmadi. Goldan oldin o‘zgarish qildik va bu ta’sir ko‘rsatdi. Ikkita hujumchiga ham e’tirozimiz bo‘ldi.

— Yangilangan «Olimpik»ka qarshi ko‘pchilik «Nasaf»ga oson bo‘ladi deb o‘ylagandi?!
— Men unday deb o‘ylamagan edim. Hozir jamoadagi yigitlar o‘zini ko‘rsatish uchun katta motivasiya bilan harakat qilmoqda. Bu karyerasi uchun muhim. Ularga yuqori baho beraman.

— Chempionlik poygasidagi raqobat haqida fikringiz qanday?
— Biz oxirigacha kurashamiz. Hali mavsum tugamadi, ammo imkoniyatimiz bor. Har bir bahs finalga teng. Har bir o‘yinga jiddiy yondashsak maqsadimizga yetish osonroq bo‘ladi deb o‘ylayman.

— «Nasaf»ning hujumdan tashqari yana qaysi aspektlarda ishi yurishmadi deb o‘ylaysiz?
— Hujumdagi agressiya yetishmagani aniq. Maydonning xolati sababli to‘pni nazorat qila olmadik. Hatto, eng yaxshi texnika egasi Oybek Bozorovda ham xatolar kuzatildi. Bugun bu omillar ko‘zga ko‘rindi.