"Chelsi"ning sobiq futbolchisi Jon Obi Mikel klub o‘tgan yozda Viktor Osimxen bilan shartnoma imzolash arafasida bo‘lganini aytdi.
Yaqinda "Napoli" hujumchisi ijara asosida Turkiyaning "Galatasaroy" klubiga o‘tdi. Yozning so‘nggi kunlarida nigeriyalik futbolchi "Chelsi"ga o‘tishi mumkin edi, ammo "ko‘klar" u bilan hamkorlikning ba’zi tafsilotlari bo‘yicha kelisha olishmadi.
"Biz juda yaqin edik - men bemalol shunday degan bo‘lardim", deydi o‘z vatandoshining "Chelsi"ga o‘tishini faol ravishda olg‘a surayotgan Obi Mikel. "Biz shartnomani tuzishga bir necha soat qolgan edik. Ammo yo‘limizda kichik muammolar bor edi. Qolaversa, oz fursat qoldi.
O‘ylaymanki, biz yanvarda yoki yozda yana bu variantga qaytishimiz mumkin. Faqat kichik tafsilotlarni hal qilish kerak", - dedi taniqli sobiq yarim himoyachi Obi One podkastida.
