Ronald Kuman va Xavi «Barselona»da ko‘zlangan manzilga yetib borolmadilar, lekin ular Kataloniya klubida salmoqli meros qoldirdilar birin-ketin. Boshqacha aytganda, «Barsa»ning ikki afsonasi bosh murabbiy rolidagi davrida jami 400 million yevrolik yosh yulduzlarni kashf etdi.

«Barselona» bir necha yillardan buyon qayta shakllanish jarayonini yakuniga yetkazolmayapti. Chunonchi, Kataloniya grandi surunkali moliyaviy muammolar bilan yashamoqda. Shunga qaramay, sovrinlarni ham qo‘lga kiritmoqda, baribir. To‘g‘ri, har mavsum emas. Xullas, tarkibni yoshartirgani «Barselona» uchun so‘ng­gi yillardagi asosiy muvaffaqiyat bo‘lib turibdi.

Pedri, Gavi, Alexandro Balde, Lamin Yamal, Pau Kubarsi va Fermin Lopes - bular «Barsa» tarkibiga yopirilib kirgan asosiy iqtidorlar. Qolaversa, navbatini kutayotgan yigitlar ham bor: Ektor Fort, Ignasio Pena, Mark Kasado. Hozirda ushbu yigitlarning transferi umumiy hisobda 400 million yevrodan oshadi. Ularni esa aynan Ronald Kuman va Xavi katta davraga boshlashdi. Har ikki menejer ish jarayonida yetarlicha tanqidga uchragani bor gap. Lekin bugunning haqiqati shuki, Kuman va Xavi klubga munosib meros qoldirishdi.