Buyuk Britaniya bosh vaziri Kir Starmerning aytishicha, hukumat UYEFA tomonidan mumkin bo‘lgan jazoga qaramay, mamlakatda mustaqil futbol regulyatorini yaratish rejalaridan voz kechish niyatida emas.

"Menimcha, qoidalar bilan bog‘liq hech qanday muammo yo‘q, chunki biz haqiqatan ham mustaqil regulyator haqida gapiryapmiz. Biz UYEFA bilan aloqa o‘rnatmoqdamiz va ishonchim komilki, yechim topiladi", - dedi Starmer The Times bilan suhbatda.

Joriy yilning mart oyida Britaniya hukumati boy klublarning tan olinmagan ligalarga qo‘shilishiga to‘sqinlik qiluvchi va klublarni moliyaviy firibgarliklardan himoya qiladigan yangi nazorat organi uchun qonunchilikni kiritdi. Sentyabr oyida UYEFA bosh kotibi Teodor Teodoridis Buyuk Britaniyaning Madaniyat, OAV va sport bo‘yicha davlat kotibi Liza Nendiga maktub yozib, "hukumat futbol rivojiga aralashmasligi kerak" degan edi. Teodoridisning so‘zlariga ko‘ra, UYEFA qoidalariga ko‘ra, hukumatning futbolga aralashuvi tufayli Angliya tashkilotdan chiqarib yuborilishi mumkin, bu esa Britaniya jamoalarini UYEFA turnirlarida, jumladan, yevrokuboklarda va Yevropa chempionatida ishtirok etishdan chetlashtirishga olib keladi.