Буюк Британия бош вазири Кир Стармернинг айтишича, ҳукумат УЕФА томонидан мумкин бўлган жазога қарамай, мамлакатда мустақил футбол регуляторини яратиш режаларидан воз кечиш ниятида эмас.
"Менимча, қоидалар билан боғлиқ ҳеч қандай муаммо йўқ, чунки биз ҳақиқатан ҳам мустақил регулятор ҳақида гапиряпмиз. Биз УЕФА билан алоқа ўрнатмоқдамиз ва ишончим комилки, ечим топилади", - деди Стармер The Times билан суҳбатда.
Жорий йилнинг март ойида Британия ҳукумати бой клубларнинг тан олинмаган лигаларга қўшилишига тўсқинлик қилувчи ва клубларни молиявий фирибгарликлардан ҳимоя қиладиган янги назорат органи учун қонунчиликни киритди. Сентябрь ойида УЕФА бош котиби Теодор Теодоридис Буюк Британиянинг Маданият, ОАВ ва спорт бўйича давлат котиби Лиза Нендига мактуб ёзиб, "ҳукумат футбол ривожига аралашмаслиги керак" деган эди. Теодоридиснинг сўзларига кўра, УЕФА қоидаларига кўра, ҳукуматнинг футболга аралашуви туфайли Англия ташкилотдан чиқариб юборилиши мумкин, бу эса Британия жамоаларини УЕФА турнирларида, жумладан, еврокубокларда ва Европа чемпионатида иштирок этишдан четлаштиришга олиб келади.
