Rossiyalik sportchi Barselona shahrida o‘tkazilgan Ironman triatlon musobaqasi chog‘ida cho‘kib ketdi.

Manbaga ko‘ra, voqea 6 oktyabr, yakshanba kuni sodir bo‘lgan. Suzish boshlanganidan ko‘p o‘tmay suvdan 41 yoshli rossiyalik ayolning hushsiz tanasi topilgan. Mahalliy shifokorlar guruhi sportchini jonlantirishga harakat qilgan, biroq shifokorlarning urinishlariga qaramay, ayol tez yordam mashinasida kasalxonaga olib ketilayotganda yo‘lda vafot etgan.

Fojiadan bir necha soat o‘tgach, rossiyalik ayolning o‘lim holati bo‘yicha tergov boshlandi.

“Biz sportchining oila a’zolari va do‘stlariga chuqur hamdardlik bildiramiz va ushbu og‘ir damlarda ularni qo‘llab-quvvatlashda davom etamiz. Triatlonchiga tibbiy yordam ko‘rsatishda tezkorlik bilan ishlagan dengiz qutqaruv guruhi, tibbiyot xodimlari va ko‘ngillilarga minnatdorlik bildiramiz”, deyiladi turnir tashkilotchilari bayonotida.

Ironman musobaqasi uch bosqichda bo‘lib o‘tadi: O‘rta yer dengizida 3800 m suzish, 180,25 km yo‘lda velosiped haydash va 42,195 km marafon poygasi.