Britaniyalik superog‘ir vazn toifasi bokschilari Entoni Joshua va Daniel Dyubua o‘rtasidagi revansh jangi tasdiqlandi.
Ushbu jang 2025 yilning 22 fevral kuni Saudiya Arabistoni poytaxti Ar-Riyod shahrida o‘tkaziladi. Bu haqda Saudiya Arabistoni ko‘ngilochar boshqarmasi rahbari, bugungi kundagi eng katta promouterga aylangan Turki Al ash-SHeyx xabar berdi. Aynan uning o‘zi bokschilarning ilk jangini ham tashkil qilgandi.
21 sentyabr kuni Londondagi "Uembli" stadionida 90 mingdan ziyod tomoshabin ko‘z o‘ngida o‘tgan jangda Daniel Dyubua nomdor raqibini beshinchi raundda nokautga uchratib, to‘laqonli IBF chempionlik kamarini qo‘lga kiritgandi. Jang to‘xtatilguniga qadar Dyubua uch bor Joshuani nokdaun holatiga ham tushirib qo‘ygan edi.
O‘sha g‘alabadan keyin Daniel Dyubua Aleksandr Usik - Tayson Fyuri jangi g‘olibiga qarshi ringga chiqish uchun bosh da’vogarga aylangandi. Usik va Fyuri o‘rtasidagi ikkinchi jang 21 dekabr kuni Ar-Riyod shahrida bo‘lib o‘tadi.
