O‘zbekiston mezbonligida o‘tgan dzyudo bo‘yicha Harbiylar o‘rtasidagi 42-Jahon chempionati o‘z yakuniga yetdi.

“Yunusobod” sport majmuasida 3 kun davom etgan musobaqada dunyoning 30 dan ortiq davlatidan 400 nafarga yaqin harbiy dzyudochilar jahon chempionati medallari uchun bahs olib bordi. Yakkalik musobaqasida 5 ta oltin, 5 ta kumush, 3 ta bronza medalini qo‘lga kiritgan O‘zbekiston terma jamoasi yakunda umumjamoa hisobida 1-o‘rinni qo‘lga kiritdi.

Kecha 18 oktyabr kuni Jahon chempionatining so‘nggi kunida jamoaviy bellashuvlar tashkil etildi. Ayollar o‘rtasidagi bahslarda o‘zbekistonlik qizlar jahon chempioniga aylandi. Mezbonlarning ayollar terma jamoasi finalda fransiyalik dzyudochilarni 3:1 hisobida yengdi.

O‘zbekiston erkaklar terma jamoasi esa murosasiz kechgan final uchrashuvida mo‘g‘ulistonlik harbiy dzyudochilarga 2:3 hisobida imkoniyatni boy berib qo‘ydi.