"Torino" yarim himoyachisi Samuele Richchi "Inter"ning transfer maqsadiga aylandi.
"Neradzurrilar" vakillari italiyalikning qobiliyatini juda yuqori baholaydilar va uni "Chalxano‘g‘lining ideal o‘rinbosari" deb bilishadi, deya xabar beradi jurnalist Janluidji Longari. Qiyinchilik shundaki, 23 yoshli yarim himoyachiga bozorda talab katta - unga "Manchester Siti" va "Real" ham qiziqish bildirmoqda.
Samuele Richchining narxi Transfermarkt portali ekspertlari hisobiga ko‘ra, 28 million yevro. Futbolchi "Torino" safida joriy mavsumdagi 12 o‘yinda bittadan golli uzatmani amalga oshirgan. U Italiya terma jamoasida ham olti marta maydonga tushgan.
