Superligada 23-tur o‘yinlari davom ettirildi. "Dinamo" jamoasi bu tur Qarshida "Qizilqum"ga qarshi bahs olib bordi va 2:1 hisobida g‘alaba qozondi. Bellashuvdan so‘ng jamoa bosh murabbiyi Vadim Abramov matbuot anjumanida ishtirok etdi.
Juda og‘ir o‘yin bo‘ldi. Vaholanki, tezkor gol urib boshlagan edik. Afsuski, muammolarimiz o‘sha-o‘sha. Yo‘q joydan penalti olib keldik boshimizga. Shunga qaramay, yigitlarga bahs uchun tashakkur. 3 ta tur qoldi. Qolaversa, zaxira o‘rindig‘imiz tor. Shu bois, o‘zimiz istagan futbolni ko‘rsata olmayapmiz. Asosiy raqobatchimizni yengdik. Mavsumni tugatib, kelajak rejalarini tuzamiz.
"Nasaf"ga yutqazilgan o‘yindan ko‘ra bugun yomonroq futbol ko‘rdik, ammo g‘alaba qozondi jamoa!?
Haqsiz. Biz 3 ta bahsda tengma-teng bahsda mag‘lubiyatga uchradik. "Qizilqum" yoqimsiz raqib. Ular bizga mana shunday futbol taklif etishdi.
Raqibga past baho berish noto‘g‘ri. Bugun oson bo‘lmasligi aniq edi. Ular o‘tgan turda "Paxtakor"ni yenggan edi. Bugun omad biz tomonda bo‘ldi.
Mavsum boshida olib kelgan futbolchilaringizdan qanchalar ko‘yningiz to‘ldi?
Albatta, xatolarsiz bo‘lmaydi. O‘ylashimcha, 60/40. To‘g‘ri topganlarimiz ko‘proq, ammo nishonga tegmaganlari ham bor. Biz mavsumda yana ham yaxshiroq ishtirok etishimiz mumkin edi. Kubokda ham chempionatda ham. Vaqt ko‘rsatadi.
Anvar Hojimirzayevning kelajagi borasida qaror qabul qilindimi?
Albatta, futbolchi omadli mavsum o‘tkazgach, unga qiziqish ortadi. Men kimnidir kuch bilan ushlab qolishga qarshiman. U ham, biz ham rozi bo‘ladigan taklif bo‘lsa bo‘ldi. Futbolchilarning futboldagi umri qisqa. Bu normal. Hozir hammasi unga bog‘liq. Omadli mavsum bo‘lyaptimi, omadni mahkam ushlash kerak.
"Dinamo"da nega stabillik yo‘q?
Bizda keng zaxira o‘rindig‘i yo‘q. Kimdir jarohat olsa, ularni almashtirishni imkoni bo‘lmaydi. Yetakchilarimizning yo‘qligi yoki o‘yini chiqmasligi bizga ta’sir qiladi. Birgina Kojoning terma jamoaga borib kelishi yaxshigina ta’sir qiladi. Futbolchilar tirik odam. Ular biroz amaliyotsiz qolsa, bu bo‘shliq darrov seziladi. Bizda haqiqatdan ham stabillik yo‘q.
