Hamyurtlarimiz Afruza Hamdamova 16 yoshgacha bo‘lgan qizlar o‘rtasida yetakchiga aylangan bo‘lsa, 14 yoshgacha bo‘lgan qizlar orasida terma jamoamiz a’zosi Nilufar Imomqo‘ziyeva g‘oliblikka asosiy da’vogarlardan biriga aylanib oldi.
6-tur bahslarida Afruza Hamdamova qora donalarda argentinalik Ernestina Adamni 38-yurish holatida taslim etdi. Ushbu g‘alaba evaziga hamyurtimizning ochkolari soni 5,5 taga yetdi va 65 nafar ishtirokchi orasida yakka peshqadamga aylandi.
14 yoshgacha bo‘lgan shaxmatchi qizlar orasida hamyurtimiz Nilufar Imomqo‘ziyeva jahon chempionatiga bekorga kelmaganini namoyish etmoqda. Mahoratli shaxmatchi qizimiz ortda qolgan 6 ta turning 5 tasida g‘alabaga erishgan bo‘lsa, 1 tasida durang natija qayd etdi.
6-turda polshalik Viktoriya Smetanskayani mag‘lubiyatga uchratishi natijasida Nilufar 95 nafar ishtirokchi orasida g‘oliblikka asosiy da’vogarlardan biriga aylanib oldi. Ortda qolgan 6-turda terma jamoamiz a’zosi Javohir Bozorov qora donalarda fransiyalik Virjil Braylga imkoniyatni boy berib qo‘ydi.
Bugun jahon chempionatining navbatdagi 7-turida Afruza Hamdamova qozog‘istonlik Elnaz Kaliaxmet bilan, Nilufar Imomqo‘ziyeva gruziyalik Kesari Mgeladze bilan, Javohir Bozorov braziliyalik Kim Pol Mariani bilan kuch sinashadi.
