"Manchester Yunayted" bosh murabbiyi o‘zgarganiga qaramay, kelasi yozda "Everton" himoyachisi Jarrod Brantueytni sotib olishni rejalashtirmoqda.

O‘tgan yozda "MYU" Brantueyt uchun 50 million funt sterling miqdorida ikkita taklif yuborgan edi, ammo "Everton" Jarrod uchun ko‘proq so‘ragan edi.

Shundan so‘ng "Manchester Yunayted" bosh murabbiyi Erik Ten Xagni iste’foga chiqardi va uning o‘rniga keyingi haftadan ish boshlaydigan Ruben Amorimni tayinladi.

talkSPORT nashri xabariga ko‘ra, "Manchester Yunayted" sport direktori Den Eshuort Brantueyt Amorimning 3-4-3 o‘yin uslubiga mos kelishiga ishonchi komil, shuning uchun 22 yoshli ingliz futbolchisi uchun reja o‘z joyida qolmoqda.

Brantueytga yaqin manbaning ta’kidlashicha, Jarrod shuhratparast va Premyer-liganing top-klubida o‘ynashni xohlaydi.

Biroq, kelasi yozda Brantueyt uchun kurashda "Manchester Yunayted" "Liverpul" bilan raqobatga duch kelishi mumkin. Chunki "qizillar" o‘z sardori Virjil van Deykning kelajagi masalasini haligacha hal qilmagan.

Qo‘shimcha qilamizki, Brantueyt jarohati tufayli "Everton"ning joriy mavsumida hali asosiy tarkibda maydonga tushmadi.