Saudiya Arabistoni poytaxti Ar-Riyod shahrida tennis bo‘yicha yilning Yakuniy WTA turniri davom etmoqda.
WTA reytingida 5-o‘rinni egallab turgan qozog‘istonlik Yelena Ribakina guruh bosqichining so‘nggi uchrashuvida dunyoning birinchi raketkasi belaruslik Arina Sobolenkoni uch set natijasiga ko‘ra mag‘lub etishga muvaffaq bo‘ldi - 6/4, 3/6, 6/1.
Lekin bu g‘alaba Yelena uchun tatimadi. Boisi, u dastlabki ikki uchrashuvda mag‘lubiyatga uchrab, pley-offga chiqish imkoniyatidan mahrum bo‘lib ulgurgandi. Arina esa aksincha, ikki bahsda zafar quchib, muddatidan oldin 1/2 final masalasini hal qilgandi.
Tennis malikalarining o‘zaro uchrashuvlarida Sobolenko hamon oldinda bormoqda - 6:3. Bir yuz bir daqiqa davom etgan bahsda Sobolenko 4, Ribakina 6 ta eys zarbasini amalga oshirgan.
