Olimpiya o‘yinlarida o‘z nomini zarhal harflar bilan qoldirayotgan taekvondochimiz, ikki karra Olimpiada chempioni Ulug‘bek Rashitov yangi siklga yangi rejalar bilan qadam qo‘ymoqda. Bugun uning bu boradagi maqsadlari haqida gaplashamiz.

– Ijtimoiy tarmoqda boshqa vazn toifasiga o‘tashingiz haqida ishora ko‘rdik. Bu haqiqatmi? -80 kg vazn toifasiga o‘tadigan bo‘lsangiz, u yerdagi raqobatni qanday ko‘ryapsiz? O‘zbekiston terma jamoasining o‘zida bu vaznda kuchli yigitlar bor.
– Ha, bu rost. Kelgusi Olimpiya o‘yinlarida -80 kg vazn toifasida ishtirok etmoqchiman. Bu borada rejalarimiz bor. Dastlab -74 kg, so‘ng -80 kg toifasiga ko‘tarilib, reyting ochkolarini jamg‘arishga kirishaman. Bajonidil -68 kg vazn toifasida jang qilishni davom ettirgan bo‘lardim, biroq endilikda ko‘p miqdorda vazn tashlash salomatligim uchun ancha xavfli bo‘lib qoladi. Yoshim bilan barobar vaznim ham yuqorilab bormoqda. Bu tabiiy jarayon. Albatta, o‘zimizda ham bu Olimpiya vaznida kuchli yigitlar yetarlicha. Avvalo, jahon miqyosiga ko‘tarilish uchun ichki raqobatdan o‘tishim kerak.

– Kolleksiyangizda jahon chempionatining oltin medali uchun joy bo‘sh qolmoqda. Uni qachon to‘ldirish niyatidasiz?
– Birinchi imkoniyat bo‘lishi bilanoq. Keyingi jahon chempionatimiz 2025 yil Xitoyda o‘tishi belgilangan. Shuning o‘zidayoq bu maqsadimni amalga oshirish uchun bor kuchimni ishga solaman.

– Bir necha yildan beri shug‘ullanayotgan yosh sportchilarda natija birdan ko‘rinmasligi mumkin. Ularga qanday maslahat bergan bo‘lardingiz?
– Hech qachon mehnat qilishdan to‘xtamaslik kerak. Har bir mag‘lubiyat sportchiga qaysidir ma’noda saboq beradi. Undan to‘g‘ri xulosa chiqara olgan, o‘zi ustida ishlaydigan, murabbiyi bilan raqiblariga to‘g‘ri taktika qo‘ya olgan sportchi, albatta, g‘alaba qozonadi. Mana shu yo‘nalishda kuchli jamoam va murabbiyim borligi mening katta yutug‘im.