"Liverpul" bosh murabbiyi Arne Slot jamoa darvozaboni Alissonning oktyabr oyi boshida APL doirasida "Kristal Pelas"ga qarshi o‘yinda olgan jarohatidan so‘ng tuzalib ketgani haqida fikr bildirdi.

"Biz barcha o‘yinchilar bilan ehtiyot bo‘lamiz, ayniqsa mushaklardagi jarohatlar haqida gap ketganda. Alisson darvozabonlar murabbiyi bilan individual mashg‘ulotlarga qaytdi, u hozircha asosiy guruh bilan mashg‘ulot o‘tkazmayapti, lekin tez orada safga qaytishini kutamiz.

U yaxshilanmoqda. Lekin yakshanba kuni "Sautgempton"ga qarshi o‘yinga yaroqli bo‘ladi deb o‘ylamayman", - deya qo‘shimcha qildi Slot.

Alisson shu hafta jarohatidan to‘liq tiklanishga ulgurmasa, 27 noyabr, chorshanba kuni bo‘lib o‘tadigan Chempionlar ligasining navbatdagi o‘yinini ham o‘tkazib yuborishi mumkin.