Superliganing 25-turidan o‘rin olgan “Qizilqum” – “Navbahor” (1:5) uchrashuvidan keyingi matbuot anjumanining birinchi qismida mehmonlar bosh murabbiyi Sergey Lushan ishtirok etib OAV xodimlarining savollariga javob berdi.

“Lochinlar” ustozi odatdagidek, o‘z so‘zini bellashuv borasidagi fikrlari bilan boshladi.

— Shogirdlarim sifatli va yaxshi o‘yin namoyish etishdi. Uchrashuv yakuni va natijasidan xursandman.

— Odiljon Hamrobekovning asosiy tarkibda maydonga tushmasligi sababi nimada?
— Bu tabiiy holat. U nafaqat bizda, balki, terma jamoada ham almashtirilmaydigan futbolchi. Jamoaning asosiy futbolchisi bo‘lsa-da, Odilga dam bermoqchi edik, bugun uning xizmatlaridan umuman foydalanmoqchi emasdik. Lekin tarkibimizda muammolar bor edi, to‘rt  nafar futbolchimiz diskvalifikasiya sababli, maydonga tusha olmasdi. Shuning uchun o‘yinga qadar u bilan gaplashib oldik va 15-20 daqiqa o‘ynashini so‘radik.

— Oldingizda tarkibni yoshartirish vazifasi qo‘yilgan bo‘lsa, bu ishni boshladingizmi?
— Klub strategiyasi shunday bo‘lmoqda. Lekin kelasi yili jamoada kim ishlashini bilmaymiz. To‘g‘ri, ayni damda klubdagilar tarkibni yoshartirishni, klubdan chiqqan futbolchilarni, Superliganing boshqa klublaridagi namanganliklarni “Navbahor”ga qaytarishni reja qilishmoqda. Reja shunday, ammo buni amalga oshira olamizmi, yo‘qmi, bilmaymiz.

— Mish-mishlarga qaraganda “Navbahor”ning ko‘plab futbolchilari “Neftchi”ga o‘tarmish. Bu haqda nima deya olasiz?
— Bo‘lishi mumkin. Lekin mish-mishlar haqida biror aniq gap aytib ham bo‘lmaydi. Bu juda qiyin. Mavsum yakunlanganidan keyin ko‘ramiz. Futbolchilar qayerni xohlashsa, o‘sha yerga intilishadi. Bu kasb, bu hayot. Bu borada biror narsa deya olmayman.

“Navbahor” PFK matbuot xizmati.