"Inter" bosh murabbiyi Simone Indzagi "RB Leypsig"ga qarshi (1:0) Chempionlar ligasidagi g‘alabasi haqida o‘z fikrini aytdi. Uchrashuv taqdirini 27-daqiqada mehmonlar himoyachisi Kasello Lukeba tomonidan kiritilgan avtogol hal qildi.

"Albatta, biz xursandmiz, chunki bu uchrashuv qanchalik muhimligini bilardik. Ha, "RB Leypsig" Chempionlar ligasida nol ochkoga ega, ammo o‘tgan shanbaga qadar jamoa Bundesligada ikkinchi o‘rinda edi va eng kam gol o‘tkazib yubordi.

Biz kuchli va uyushgan raqib bilan to‘qnash keldik. Bizdan muvozanatni saqlash talab qilingandi, ammo bunday agressiv va pressingli jamoaga qarshi kurashish oson emas. Bizning asosiy muammomiz shundaki, ikkinchi golni ura olmadik, ammo darvozamiz oldida katta xavf yo‘q edi", - dedi Indzagi.