"Bavariya" vingeri Maykl Olise mavsumning birinchi yarmi haqida o‘z fikrlari bilan o‘rtoqlashdi.

Fransiyalik futbolchi Myunxen klubiga iyul oyida Angliyaning "Kristal Pelas" klubidan ko‘chib o‘tgandi. Vensan Kompani jamoasida 23 ta o‘yinda maydonga tushgan futbolchi 9 ta gol urdi va 9 ta golli uzatmani amalga oshirdi.

"Bavariya meni sotib olmoqchi ekanini bilganimda juda xursand bo‘ldim. Hozir men klub ruhiga yanada singib ketdim. "Bavariya" ajoyib mentalitetga ega - siz doimo g‘alaba qozonishingiz kerak. "Kristal Pelas"da biz ko‘pincha himoyalanar edik, lekin bu yerda hech qachon bunday bo‘lmaydi. Bosim juda yuqori, shuning uchun biz har bir uchrashuvda g‘alaba qozonishni istaymiz va kerak. Lekin bu menga yoqadi va bu sharoitda o‘zimni yanada yaxshi ko‘rsata olaman deb o‘ylayman", - deya Olisening so‘zlarini keltiradi Bayern & Germany.