22-26 dekabr kunlari Rossiyaning Boshqirdiston Respublikasi Ufa shahrida belbog‘li kurash buyicha xalqaro turnir, erkaklar va ayollar o‘rtasida jahon kubogi musobaqasi bo‘lib o‘tdi.
Mazkur ikki musobaqada mamlakatimiz polvonlari ham terma jamoa bosh murabbiyi Shavkat Mirzaqulov hamda yordamchi murabbiy Yusuf Barnoqulovlar boshchiligida to‘liq tarkib bilan ishtirok etishdi.
Yigirmadan ortiq davlatdan kelgan eng sara polvonlar ishtirokidagi ushbu jahon kubogi va xalqaro turnirda vakillarimizning qo‘lga kiritgan natijalari tahsinga sazovor bo‘ldi.
Xususan, terma jamoamiz a’zolaridan Abultolib Mahkamov, Mamarajab Rahmatov, Zaylobiddin Ortiqov, Manzuraoy Mo‘ydinova, Og‘abek Amatboyev, Samandar Egamerdiyev, Navro‘z Mamayusupov, Yodgor Almazov, Shoxrux Qurbonmurodov, Azim Norqulov, Behruz Abdurahmonov, Yunus Sunnatov, Sarvar Ikromov hamda Nuraziz Ilhomedinovlar kuchli uchlikdan joy olishga muvaffaq bo‘lishdi.
Shuningdek, jahon kubogining so‘nggi kunida terma jamoalar o‘rtasidagi aralash miks bahslari ham bilib o‘tdi. Mazkur jamoaviy bellashuvlarda terma jamoamiz uchinchi o‘rinni band etib, bronza medallariga egalik qilishdi.
Shu tariqa savrindorlar qatoridan joy olishga erishgan polvonlarimiz shoda-shoda medallar bilan yurtimizga qaytib kelishdi va ular tantanali kutib olindi, jumladan, terma jamoamiz tarkibida ishtirok etgan Navoiy viloyati sportchilari ham Navoiy olimpiya va paralimpiya sport turlariga tayyorlash markazida, shahar hokimligi, viloyat sport boshqarmasi, sport-ta’lim muassasalari vakillari hamda sportchilarning yaqinlari tomonidan munosib kutib olindi.
