"Andijon" yangi mavsum uchun tarkibini kuchaytirishda davom etmoqda. Bu safar birdaniga uch nafar futbolchi bilan shartnomalar imzolandi.

O‘tgan yilning ikkinchi yarmida "Dinamo" klubidan ijaraga kelgan yarim himoyachi Damir Temirov mavsum yakunlangach, yana o‘z jamoasiga qaytgandi. O‘zaro olib borilgan muzokaralardan so‘ng 26 yoshli Temirov to‘laqonli ravishda "Andijon" a’zosiga aylandi va yangi mavsumda jamoa safida o‘tkazadi.

Damir o‘tgan yili "Andijon" libosida 14 ta uchrashuvda maydonga tushdi va 3 ta golli pasni amalga oshirdi.

Shuningdek, “Andijon” futbol maktabi tarbiyalanuvchisi, professional faoliyatini 2018 yilda Andijonda boshlab, 2021 yilgacha o‘ynagan hamda 2022 yildan faoliyatini "Bunyodkor"da davom ettirgan iqtidorli himoyachi Usmonali Ismonaliyev yana qadrdon klubiga qaytdi.

Ismonaliyev oxirgi uch yilni "Bunyodkor"da o‘tkazib, u yerda hammasi bo‘lib, 82 ta uchrashuvda maydonga tushgan holda raqiblar darvozasiga 16 ta gol urdi va 7 ta golli pasni uzatdi.

Usmonali yangi mavsumda yana "Andijon" sharafini himoya qiladi.

Shu bilan birga jamoa safiga Osiyo chempioni – Abubakir Ashurov ham qo‘shildi. O‘zaro muzokaralar ijobiy yakun topgach, tomonlar hamkorlik borasida shartnoma imzoladilar.

2003 yilda tavallud topgan Ashurov “Paxtakor” tarbiyalanuvchisi hisoblanadi. Oxirgi klubi Bekobodning “Metallurg” klubidir. Qolaversa, u “Turon”da ham to‘p surgan.

Abubakir 2023 yili O‘zbekiston U20 terma jamoasi safida Osiyo chempionligini qo‘lga kiritgan hamda yoshlar o‘rtasidagi jahon chempionatida ham ishtirok etgan.

E’tiborlisi, uchala o‘yinchi bilan ikki yillik shartnomalar imzolandi.

"Jamoamizga qo‘shilgan futbolchilar yangi mavsumda o‘zlarini har tomonlama ko‘rsatishlariga ishonamiz!" - deyiladi "burgutlar"ning rasmiy bayonotida.