"Андижон" янги мавсум учун таркибини кучайтиришда давом этмоқда. Бу сафар бирданига уч нафар футболчи билан шартномалар имзоланди.

Ўтган йилнинг иккинчи ярмида "Динамо" клубидан ижарага келган ярим ҳимоячи Дамир Темиров мавсум якунлангач, яна ўз жамоасига қайтганди. Ўзаро олиб борилган музокаралардан сўнг 26 ёшли Темиров тўлақонли равишда "Андижон" аъзосига айланди ва янги мавсумда жамоа сафида ўтказади.

Дамир ўтган йили "Андижон" либосида 14 та учрашувда майдонга тушди ва 3 та голли пасни амалга оширди.

Шунингдек, “Андижон” футбол мактаби тарбияланувчиси, профессионал фаолиятини 2018 йилда Андижонда бошлаб, 2021 йилгача ўйнаган ҳамда 2022 йилдан фаолиятини "Бунёдкор"да давом эттирган иқтидорли ҳимоячи Усмонали Исмоналиев яна қадрдон клубига қайтди.

Исмоналиев охирги уч йилни "Бунёдкор"да ўтказиб, у ерда ҳаммаси бўлиб, 82 та учрашувда майдонга тушган ҳолда рақиблар дарвозасига 16 та гол урди ва 7 та голли пасни узатди.

Усмонали янги мавсумда яна "Андижон" шарафини ҳимоя қилади.

Шу билан бирга жамоа сафига Осиё чемпиони – Абубакир Ашуров ҳам қўшилди. Ўзаро музокаралар ижобий якун топгач, томонлар ҳамкорлик борасида шартнома имзоладилар.

2003 йилда таваллуд топган Ашуров “Пахтакор” тарбияланувчиси ҳисобланади. Охирги клуби Бекободнинг “Металлург” клубидир. Қолаверса, у “Турон”да ҳам тўп сурган.

Абубакир 2023 йили Ўзбекистон У20 терма жамоаси сафида Осиё чемпионлигини қўлга киритган ҳамда ёшлар ўртасидаги жаҳон чемпионатида ҳам иштирок этган.

Эътиборлиси, учала ўйинчи билан икки йиллик шартномалар имзоланди.

"Жамоамизга қўшилган футболчилар янги мавсумда ўзларини ҳар томонлама кўрсатишларига ишонамиз!" - дейилади "бургутлар"нинг расмий баёнотида.