Каталониянинг «Барселона» клуби Дортмунднинг «Боруссия» жамоаси академиясида тўп тепаётган 15 ёшли ярим ҳимоячи Жастин Эжодаменга қизиқишини кучайтирди.

Diario Sport нашрининг хабар беришича, каталонияликлар футбол жамоатчилигида «янги Жуд Беллингем» деб аталаётган иқтидорли футболчини ўз сафига қўшиб олиш имкониятини жиддий ўрганмоқда.

Нигерияда туғилган Эжодамен ўтган ой Италиянинг 16 ёшгача бўлган футболчилардан иборат терма жамоасида дебют қилди.

Ёш ярим ҳимоячининг ўйин услуби Мадриднинг «Реал» клуби юлдузи Жуд Беллингемга қиёсланмоқда.

Хусусан, Эжодаменнинг майдоннинг ҳар икки қисмида фаол ҳаракат қилиши, жисмоний жиҳатдан кучлилиги ва тўпни оёғига яқин тутиб, моҳирона бошқара олиши унинг асосий устунликлари сифатида қайд этилмоқда.

«Барселона» сўнгги йилларда ўз академияси тарбияланувчиларини ривожлантириш билан бир қаторда, хориждаги энг иқтидорли ёш футболчиларни ҳам диққат билан кузатиб келмоқда.

Бу сиёсат доирасида клуб Ҳамза Абдулкарим ва Жесси Бисиву каби ёш футболчиларни ўз сафига қўшиб олган. Ҳар икки иқтидорли ўйинчи ҳозирда асосий жамоа даражасига кўтарилишга тайёр ҳисобланмоқда.

Бироқ Эжодамен учун рақобат кучли бўлиши кутилмоқда. Англиянинг «Арсенал» ва «Челси» клублари ҳам 15 ёшли футболчининг ривожланишини диққат билан кузатиб бормоқда.

Дортмунднинг «Боруссия» клуби эса ўзининг истиқболли тарбияланувчисини қўлдан бой беришни истамаяпти.

Шу сабабли Германия клуби Эжодаменга узоқ муддатли шартнома таклиф этиб, унинг келажагини «Боруссия» билан боғлашни режалаштирмоқда.