Мадриднинг «Реал» клуби бош мураббийи Жозе Моуриньо жамоа ичидаги жиддий муаммоларни ҳал қилишда қийинчиликларга дуч келмоқда.

The Touchline нашрининг RMC Sport маълумотларига таяниб хабар беришича, айни пайтда «Реал» кийиниш хонасида кескин муҳит ҳукм сурмоқда. Жамоа ичидаги вазият ҳатто «муздек совуқ» деб таърифланмоқда.

Маълумотларга кўра, айрим футболчилар ўртасида муносабатлар яхши эмас ва улар бир-бири билан чиқиша олмаяпти.

Моуринью бош мураббийлик лавозимига келганидан сўнг ҳам ушбу муаммони бартараф этишга муваффақ бўлмаган.

Таъкидланишича, бундай келишмовчиликлар Хаби Алонсо ва Альваро Арбелоа жамоани бошқарган даврларда ҳам мавжуд бўлган.

Сўнгги вақтларда «Реал» ичидаги вазият Килиан Мбаппенинг майдон ташқарисидаги хатти-ҳаракатлари сабабли янада кескинлашган.

Манбага кўра, Моуринью франциялик ҳужумчи билан шахсан суҳбат ўтказиб, ундан ўзини босиқроқ тутишни сўраган.

Шу тариқа, португалиялик мутахассис олдида нафақат жамоанинг майдондаги натижаларини яхшилаш, балки футболчилар ўртасидаги муносабатларни ҳам тартибга солиш вазифаси турибди.

Эслатиб ўтамиз, «Реал» Испания Ла Лигасидаги навбатдаги учрашувини 10 октябрь куни «Вильярреал»га қарши ўтказади.