Bugun, 25 yanvar kuni "Etixad" stadionida Angliya Premyer-ligasining 23-turidan o‘rin olgan "Manchester Siti" va "Chelsi" jamoalari o‘rtasidagi uchrashuv bo‘lib o‘tdi. O‘yin mezbonlarning 3:1 hisobidagi g‘alabasi bilan yakunlandi.  

Hisob o‘yinning 3-daqiqasidayoq ochildi. "Siti" safida debyut qilgan Abduqodir Husanov to‘pni bosh bilan darvozabonga uzatmoqchi bo‘ldi. Ammo uzatma sekin chiqqani uchun to‘pni Jekson egallab oldi va to‘pni Noni Maduekega uzatdi. U esa bo‘sh darvzani ishg‘ol qildi.

Oradan bir daqiqa o‘tib Husanov Palmerga nisbatan fol ishlatgani uchun sariq kartochka oldi. Keyingi daqiqalarda hamyurtimiz asta-sekin o‘ziga kelib olib, bexato o‘ynay boshladi. Jumladan, 9-daqiqada Abduqodir Jeydon Sancho tomonidan yo‘llangan zarbani qaytardi.

42-daqiqada "shaharliklar" himoyachisi Yoshko Gvardiol hisobni tenglashtirdi va shu tariqa jamoalar teng natija bilan tanaffusga yo‘l oldilar.  

Bahsning 54-daqiqasida esa Xosep Gvardiola himoyachi Husanovning o‘rniga Jon Stounzni tushirdi.

Ikkinchi bo‘limda "Manchester Siti" hujumlarni kuchaytirdi. Uchrashuvning 68-daqiqadasida Xoland "Chelsi" posbonining oldinga chiqib ketganidan foydalanib, to‘pni darvozaga joylab qo‘ydi. 87-daqiqada esa Fil Foden darvozabon bilan yakkama-yakka vaziyatga chiqib borib, o‘yinga nuqta qo‘ydi — 3:1.

Shunday qilib, "Manchester Siti" muhim g‘alabani qo‘lga kiritdi va 41 ochko bilan jadvalda 4-o‘ringa ko‘tarilib oldi.

APL, 23-tur
Manchester Siti – Chelsi 3:1 (1:1, 2:0)
Gollar: 0:1 – 3 Madueke, 1:1 – 42 Gvardiol, 2:1 – 68 Xoland, 3:1 – 87 Foden.
Manchester Siti – Ederson, Gvardiol, Akandji, Husanov (Stounz, 54), Mateush Nunesh, Gyundogan, Kovachich, Bernardu Silva, Foden, Marmush (de Bryuyne, 74), Xoland.
Chelsi – Sanches, Kukurelya, Koluill, Chaloba, Djeyms (Gyusto, 73), Fernandes, Kaysedo, Sancho (Netu, 73), Palmer, Madueke, Djekson (Nkunku, 61).
Ogohlantirishlar: Husanov (4), Koluill (25), Kaysedo (58), Bernardu Silva (79), Kovachich (83).