Niderlandiyada shaxmat bo‘yicha an’anaviy Tata Steel Chess 2025 musobaqasi davom etmoqda. Musobaqada O‘zbekistonning 2 shaxmatchisi g‘oliblik uchun kurash olib bormoqda.
Kecha, 29 yanvar kuni o‘tkazilgan 10-turda Masters guruhi peshqadamlari safida borayotgan Nodirbek Abdusattorov oq donalarda o‘ynab serbiyalik Aleksey Saranani mag‘lub etdi. Shaxmatchi hozirgacha musobaqada mag‘lub bo‘lmagandi. Ushbu g‘alabadan so‘ng Abdusattorov o‘z hisobidagi ochkolar sonini 7 taga yetkazib, turnir jadvalida ikkinchi o‘rinda bormoqda.
Hindistonlik Gukesh Dommaradju turnir jadvalining eng yuqorisida joylashgan. Amaldagi jahon chempioni qora donalarda harakat qilganiga qaramay, niderlandiyalik Maks Varmerdamdan ustun keldi. Gukesh 7,5 ochko bilan yakka karvonboshi bo‘lib turibdi. Yana bir hind grossmeysteri Rameshbabu Pragnanandha ham bu turda o‘zi uchun muhim g‘alabani qo‘lga kiritdi. U sloveniyalik Vladimir Fedoseevdan ustun kelib, 6,5 ochko bilan kuchli uchlikka yakun yasagan.
Masters guruhida mag‘lubiyatga uchramagan uch nafar shaxmatchi qoldi — Gukesh Dommaradju, Nodirbek Abdusattorov va Vey Li. Xitoylik grossmeysterning 1 g‘alaba, 9 ta durang qayd etdi. Gukesh hisobida 5 tadan g‘alaba va durang bor. Abdusattorov esa 4 g‘alaba va 6 durangga ega.
Challenger guruhida qatnashayotgan Nodirbek Yakubboyev (2659) 10-turda oq donalarda niderlandiyalik Benjamin Bok bilan murosaga keldi. Yakubboyev 3 g‘alaba, 4 durang va 3 mag‘lubiyat bilan 5 ochko jamg‘argan holda turnir jadvalida 9-pog‘onadan joy olgan.
Chexiyalik Van Nguyen 7,5 ochko bilan Challenger guruhida karvonboshilik qilmoqda. Niderlandiyalik Ervin L’ami 7 ochko to‘plab, 2-o‘rinni band etgan bo‘lsa, ozarbayjonlik Aydin Suleymanli 6,5 ochko bilan qo‘shimcha ko‘rsatkichlarga ko‘ra kuchli uchlikka yakun yasagan. Benjamin Bok hisobida ham 6,5 ochko bor.
Ma’lumot uchun, musobaqa nizomiga ko‘ra, shaxmatchilar 13 ta turda dona suradi.
