"Palmeyras" Vitor Roke yoki Roberto Firminoni o‘z safiga qo‘shib olmoqchi.

Avvalroq, Braziliya klubi "Barselona"ga tegishli bo‘lgan futbolchining 80% huquqlari uchun 27 million yevro to‘lashga tayyorligi haqida xabar berilgandi.

Agar shunday bo‘lganida, hujumchining transferi 30 million yevroga tushganini hisobga olsak, "Barsa" foyda ko‘rishi mumkin edi.

Forvardning "Barselona" va "Betis" o‘rtasidagi amaldagi ijara shartnomasi 30 iyunga qadar amal qiladi va u yana bir mavsumga uzaytirish imkoniyatini o‘z ichiga oladi. Har ikki mavsum yakunida Andalusiya klubi futbolchining 80% huquqlarini 25 million yevro evaziga sotib olish huquqiga ega.

Diario Sport qayd etganidek, "Palmeyras" yozda ham xuddi shunday taklif bilan qaytishi mumkin. Roke klubda salohiyatli futbolchi sanaladi.

Shu bilan birga, Saudiya Arabistonining "Al-Ahli" jamoasida to‘p tepayotgan Roberto Firmino ham 9lik pozisiyasiga nomzod sifatida ko‘rilmoqda. "Liverpul"ning sobiq futbolchisini klublar o‘rtasidagi jahon chempionati oldidan qo‘ndirish imkoniyati "Palmeyras"ning uni tanlashi foydasiga argumentlardan biri hisoblanadi.

Biroq ayni damda futbolchi bilan ochiq muzokaralar o‘tkazilmagan. Uning amaldagi shartnomasi 2026 yilning iyunigacha mo‘ljallangan. Roke atrofidagilar bilan bevosita aloqalar davom etmoqda.