Germaniyaning Vayssenxaus shahrida "2025 Freestyle Chess Grand Slam" musobaqasi start oldi. Jahonning eng kuchli 10 nafar shaxmatchisi bugun rapid yo‘nalishida 5 tadan o‘yin o‘tkazishdi.

Xabaringiz bor, turnirda Nodirbek Abdusattorov va Javohir Sindarov ham ishtirok etishi haqida xabar berib o‘tgandik.

Demak, dastlabki 5 ta o‘yindan keyin Javohir Sindarov 4,5 ochko bilan peshqadam bo‘lib turibdi. Vatandoshimiz Vinsent Keymer (Germaniya), Levon Aronian (AQSH), Vladimir Fedoseev (Rossiya) va Magnus Karlsen (Norvegiya)ni mag‘lub etgan bo‘lsa, Gukesh Dommaradju bilan durang qayd etdi. Javohirning Magnus ustidan qozongan g‘alabasi juda chiroyli bo‘lganini ta’kidlash lozim.

Nodirbek Abdusattorov esa bugungi 5 ta bahsdan keyin 2,5 ochko jamg‘argan holda 4-o‘rinni egallab turibdi. Hamyurtimiz Gukesh (Hindiston), Nakamura va Karuana (ikkisi — AQSH) bilan durang o‘ynagan bo‘lsa, germaniyalik Vinsen Keymerga imkoniyatni boy berib qo‘ydi. Nodirbek beshinchi turda rossiyalik Vladimir Fedoseevni taslim etdi.

Alireza Firuzja 3,5 ochko bilan kuchli uchlikka kirgan bo‘lsa, Magnus Karlsen beshinchi o‘rinni band etib turibdi.

Ertangi o‘yinlarning birinchisida Abdusattorov va Karlsen o‘zaro to‘qnash kelsa, Sindarov Xikaruni sinovdan o‘tkazadi. O‘zbekistonlik ikki sportchi 7-turda o‘zaro to‘qnash kelishadi.

Ertaga bo‘ladigan yana 4 ta tur bahslaridan keyin so‘nggi pog‘onani band etgan ikki shaxmatchi musobaqani tark etadi. Qolgan 8 sportchi esa pley-off formatida o‘z ishtirokini davom ettiradi. Pley-off bosqichi klassik shaxmatdan iborat bo‘ladi. Ikki o‘yindan keyin durang qayd etilsa, g‘olib taybrekda aniqlanadi.

Eslatib o‘tamiz, musobaqaning mukofot jamg‘armasi — 750.000 dollarga teng. G‘olib shaxmatchiga 200.000 dollar beriladi.