Madridning «Real» klubi bosh murabbiyi Karlo Anchelotti «Atletiko»ga qarshi o‘yindagi (1:1) ba’zi futbolchilarning harakatidan juda norozi bo‘ldi, deb xabar beradi Footmercato.  

«Kiyinish xonasida italiyalik mutaxassis jahli chiqib, to‘rt nafar futbolchini qattiq tanqid qildi: Kilian Mbappe, Jud Bellingem, Vinisius Junior va Rodrigoni. Ular Madridda “ajoyib to‘rtlik” deb nomlangan», — deyiladi manba xabaridan.  

Anchelotti hujumchilarning maydondagi harakatidan qoniqmagan. Ularning jamoaviy o‘yin o‘rniga individual harakatlarga ko‘proq e’tibor qaratgani va yaxshi pozisiyada turgan sheriklariga pas bermagani murabbiyning g‘azabini keltirgan.  

Shuningdek, Anchelotti himoyadagi harakatdan ham norozi bo‘lgan. Uning ta’kidlashicha, hujumchilar yoki umuman himoyaga qaytishmagan, yoki juda sekinlik bilan ortga qaytishgan.  

Murabbiy jamoadan uning so‘zlariga munosabat bildirishni va keyingi o‘yinlarda o‘yinini yaxshilashni talab qilgan. Aks holda, u tarkibda o‘zgarishlar qilishini ma’lum qilgan.  

Bugun, 11 fevral kuni «Real» Chempionlar Ligasi doirasida «Manchester Siti»ga qarshi maydonga tushadi.