Мадриднинг «Реал» клуби бош мураббийи Карло Анчелотти «Атлетико»га қарши ўйиндаги (1:1) баъзи футболчиларнинг ҳаракатидан жуда норози бўлди, деб хабар беради Footmercato.  

«Кийиниш хонасида италиялик мутахассис жаҳли чиқиб, тўрт нафар футболчини қаттиқ танқид қилди: Килиан Мбаппе, Жуд Беллингем, Винисиус Жуниор ва Родригони. Улар Мадридда “ажойиб тўртлик” деб номланган», — дейилади манба хабаридан.  

Анчелотти ҳужумчиларнинг майдондаги ҳаракатидан қониқмаган. Уларнинг жамоавий ўйин ўрнига индивидуал ҳаракатларга кўпроқ эътибор қаратгани ва яхши позицияда турган шерикларига пас бермагани мураббийнинг ғазабини келтирган.  

Шунингдек, Анчелотти ҳимоядаги ҳаракатдан ҳам норози бўлган. Унинг таъкидлашича, ҳужумчилар ёки умуман ҳимояга қайтишмаган, ёки жуда секинлик билан ортга қайтишган.  

Мураббий жамоадан унинг сўзларига муносабат билдиришни ва кейинги ўйинларда ўйинини яхшилашни талаб қилган. Акс ҳолда, у таркибда ўзгаришлар қилишини маълум қилган.  

Бугун, 11 февраль куни «Реал» Чемпионлар Лигаси доирасида «Манчестер Сити»га қарши майдонга тушади.