Жаҳон футболи юлдузларидан бири, португалиялик футболчи Луиш Нани Тошкент вилоятидаги Чорвоқ дам олиш масканига оиласи билан ташриф буюрган. Ижтимоий тармоқларда тарқалган видеоларда футболчи пляжда бошқа дам олувчилар билан тўп тепаётгани акс этган.

Футболчи, шунингдек, ўзининг Instagram саҳифасида фарзандлари билан Тошкентдаги ҳайвонот боғидан сурат жойлаган.

Нани ҳозирда Қозоғистоннинг “Актобе” клубида фаолият олиб бормоқда. Шу сабабли унинг Ўзбекистонга ташрифи футбол мухлислари орасида катта қизиқиш уйғотган.

Луиш Карлос Алмейда да Куня, футбол оламида Нани номи билан машҳур, Португалия футболи тарихидаги энг ёрқин вингерлардан бири ҳисобланади. У фаолияти давомида Португалиянинг “Спортинг”, Англиянинг “Манчестер Юнайтед”, Туркиянинг “Фенербаҳче”, Испаниянинг “Валенсия”, Италиянинг “Венеция” ҳамда бошқа қатор клубларида тўп сурган.

“Манчестер Юнайтед” сафида Нани 4 марта Англия Премьер Лигаси, бир марта УЕФА Чемпионлар Лигаси ва клублар ўртасидаги Жаҳон чемпионати ғолибига айланган.

Португалия миллий терма жамоаси таркибида эса 112 та учрашувда майдонга тушиб, 24 та гол урган. Нани 2016 йилги Европа чемпионатида Португалия билан чемпион бўлган. Евро-2016 финалида Криштиану Роналдунинг жароҳатидан сўнг у жамоани сардор сифатида майдонда бошқарган футболчилардан бири бўлган.