BILD xabariga ko‘ra, Dortmundning "Borussiya" klubi sobiq bosh murabbiyi Edin Terzich "Tottenxem"da Ange Postekogluning o‘rniga nomzod bo‘lishi mumkin.
Londonning hozirgi murabbiyi omadsiz mavsumdan keyin bosim ostida qoldi. To‘rt kun ichida "shporlar" Liga kubogi va Angliya kubogidan chiqib ketishdi. Premyer-ligada jamoa bor-yo‘g‘i 14-o‘rinda.
Shunga qaramay, klub xo‘jayini Daniel Levi hamon Postekogluni saqlab qolish uchun barcha imkoniyatlarni ishga solmoqda. Shu bilan birga, manbaning xabariga ko‘ra, "shporlar" rahbariyati ehtimoliy o‘zgarishlarga hozirdan tayyorgarlik ko‘rmoqda, shu bois Edin Terzich murabbiylik lavozimiga nomzodlar ro‘yxatidan joy olgan.
Terzichning so‘nggi ish joyi "Borussiya" bo‘lib, u jamoani 2022 yilning iyulidan 2024 yilning iyunigacha boshqargan.













