Shu kunlarda Xitoyda futbol bo‘yicha U20 yosh toifasidagi Osiyo kubogining guruh bosqich o‘yinlari o‘tkazilmoqda. Unda qit’amizning 16 mamlakat terma jamoasi to‘rt guruhga bo‘lingan holda o‘zaro raqobatlashmoqda.
Bugunga qadar mazkur musobaqaning guruh bosqichida “A” “B” “S” guruhlarida ikkinchi tur uchrashuvlari o‘z yakuniga yetdi. Unga ko‘ra, “A” guruhida Avstraliya va Xitoy yoshlar terma jamoalari ikkitadan g‘alaba qozongan holda shohsupaning birinchi hamda ikkinchi o‘rnidan joy oldi va chorak final bosqichiga yo‘llanmani qo‘lga kiritdi. Endi ushbu guruhda 18 fevral kuni Avstraliya – Xitoy guruh peshqadamligi uchun o‘zaro raqobatlashsa, Qirg‘iziston – Qatar terma jamoalari shunchaki rasmiyatchilik uchun bahs olib boradilar.
Osiyo chempionatining “B” guruhida ikkinchi tur yakunlariga ko‘ra, to‘rt jamoada ham navbatdagi bosqichga chiqish imkoniyatlari saqlanib qoldi. Jumladan, bitta g‘alaba va durang qayd etgan Iroq termasi hozirda 4 ochko bilan birinchi pog‘onada borayotgan bo‘lsa, Saudiya Arabistoni va Iordaniya termalari 3 ochko jamg‘arib, gollar nisbatiga ko‘ra ikkinchi hamda uchinchi o‘rinlardan joy oldi. KXDR esa bir ochko bilan so‘nggi o‘rinda qoldi.
Bu guruhda 19 fevral kuni Iroq – Iordaniya, Saudiya Arabistoni – KXDR terma jamoalari o‘rtasida o‘yin o‘tkaziladi.
Chempionatning “S” guruhida O‘zbekiston U20 terma jamoasi 2-turda Indoneziya termasini 3:1 hisobida yengdi. Eron esa Yaman termasi darvozasiga javobsiz 6 ta gol urdi. Buning natijasida g‘olib bo‘lgan ikkala jamoa ham o‘z guruhida 6 tadan ochko jamg‘arib, 1/4 final bosqichiga yo‘l oldi. Mag‘lub jamoalar esa ochkosiz so‘nggi o‘rinlardan joy oldi. Bu guruhdagi so‘nggi tur bellashuvlari 19 fevral kuni o‘tkaziladi. Unda O‘zbekiston – Eron, Indoneziya – Yaman jamoalari raqobatlashadi.
Bugun, 17 fevral kuni “D” guruhida Suriya – Yaponiya, Janubiy Koreya – Tailand terma jamoalari ikkinchi tur doirasida o‘zaro kuch sinashadi. Ayni damda Yaponiya va Janubiy Koreya 3 ochkoga erishgan holda guruhda peshqadamlik qilmoqda. Agar bu jamoalar bugungi o‘yinlarda zafar quchsa, muddatidan avval keyingi bosqich yo‘llanmasiga ega chiqadi.
