Sobiq hakam Antonio Mateu Laos Ispaniyada hakamlar boshlig‘i bo‘lishi mumkin.

AS xabariga ko‘ra, Ispaniya Qirollik futbol federasiyasi (RFEF) joriy mavsum yakunida Hakamlar texnik qo‘mitasi (CTA) rahbariyati tarkibiga o‘zgartirishlar kiritishni rejalashtirmoqda. Xususan, yozda federasiyaning sobiq rahbari Luis Rubiales tomonidan tayinlangan qo‘mita rahbari Luis Medina Kantalyexoning, shuningdek, VAR rahbari Karlos Klos Gomesning iste’fosi rejalashtirilgan. Shuningdek, qo‘mitani Alberto Undiano Malyenko, Xose Lesma Lopes va Xuan Yuste Ximenes tark etishi kutilmoqda.

CTA rahbari lavozimiga nomzodlardan biri 2023 yilning yozida faoliyatini yakunlagan sobiq hakam Antonio Mateu Laos hisoblanadi. Biroq Laos ispaniyalik hakamlar tomonidan qo‘llab-quvvatlanmayapti.

Qayd etilishicha, RFEF rahbari Rafael Lusan Ispaniyadagi arbitraj tizimini "chuqur rekonstruksiya qilish" kerak, deb hisoblaydi, chunki hakamlar qo‘mitasi "abadiy takrorlanuvchi nizolar spiraliga tushib qolgan." Islohotlarni La Ligada mavsum yakunlanishi bilanoq boshlash rejalashtirilgan.