Argentinalik hujumchi Lionel Messi «Inter Mayami» bilan shartnomasi tugaganidan so‘ng faoliyatini ona yurtida davom ettirishi mumkin.

Messining Florida klubi bilan amaldagi shartnomasi 2025 yil dekabrigacha mo‘ljallangan. 37 yoshda bo‘lishiga qaramay, u jiddiy ravishda 2026 yilgi jahon chempionatida ishtirok etishni maqsad qilgan va yuqori saviyada o‘ynashni davom ettirishni xohlamoqda.

Carpetasfcb.com nashrining xabar berishicha, «Inter Mayami»ning egasi Devid Bekxem Messiga 2026 yilgacha shartnomani uzaytirishni taklif qilgan. Biroq sakkiz karra «Oltin to‘p» sohibi uchun kutilmagan boshqa variant ham paydo bo‘ldi. Futbolchining atrofiga yaqin manbalarga ko‘ra, u jiddiy tarzda 2000 yilda «Barselona» akademiyasiga o‘tishdan avval o‘ynagan argentinalik klubi «Nyuells Old Boyz»ga qaytish imkoniyatini ko‘rib chiqmoqda.

Bu qaror «Barselona» klubi va uning muxlislari uchun kutilmagan yangilik bo‘ldi, chunki ular hali ham Messini Kataloniyada ko‘rishni orzu qilishmoqda. Ammo Messi faoliyatini ona yurtida yakunlash va 2026 yilgi jahon chempionatiga eng yaxshi holatda tayyorgarlik ko‘rish istagi uning tanlovida hal qiluvchi omil bo‘lishi mumkin.