"Chelsi" joriy mavsumda Robert Sanchesning beqaror o‘yinidan so‘ng, darvozabon pozisiyasini kuchaytirish vaqti kelganiga ishonch hosil qildi.

Londonliklar ispaniyalik posbon bilan yozgi transfer oynasida xayrlashishni rejalashtirmoqda va uning o‘rnini egallay oladigan uchta nomzodni aniqlab olgan. Klub rahbariyati darvozadagi ishonchsizlik muammosi doimiy tus olganini hisobga olib, bu pozisiya uchun uzoq muddatli yechim topishga harakat qilmoqda. Avvalroq nomzod sifatida ko‘rilgan Filip Yorgensen oxirgi o‘yinlardagi xatolari sababli klubni to‘liq ishontira olmadi.  

Asosiy nomzodlardan biri – "Brayton" posboni Bart Verbruggen. Uning to‘pni oyoq bilan yaxshi uzata olishi va darvoza chizig‘ida ishonchli harakat qilishi "Chelsi" talablariga mos keladi. Shuningdek, u "Brayton"ga o‘tishidan avval ham "Chelsi" kuzatuvida bo‘lgan.  

Italiyada esa "Chelsi" "Parma" darvozaboni Zion Sudzuki va "Atalanta" posboni Marko Karnezekkining harakatlarini diqqat bilan kuzatib bormoqda. Ular A seriyada o‘zlarining ishonchli o‘yini bilan tanilgan bo‘lib, Premyer-ligaga moslashish uchun kerakli sifatlarga ega.  

Eslatib o‘tamiz, Robert Sanches 2023 yili "Brayton"dan "Chelsi"ga kelib qo‘shilgan edi.