Kecha Superliganing ilk turi doirasida «Qizilqum» klubi «Surxon»ni (2:0) mag‘lub etib, dastlabki uch ochkoni qolga kiritdi.

Ushbu bellashuvda jamoaning ukrainalik legioneri Roman Papariga «Qizilqum»tarkibidagi ilk rasmiy uchrashuvida debyut golini kiritdi. Hujumchi uchrashuvdan so‘ng o‘z fikrlari bilan o‘rtoqlashdi.

"Kechagi o‘yin menda katta taassurot qoldirdi. Birinchi navbatda muxlislarimiz qo‘llab-quvvatlaganlari uchun rahmat, bu bizga maydonda yanada kuch bag‘ishladi. Shuningdek, murabbiylar shtabiga ham mehnatlari uchun rahmat aytmoqchiman.

O‘ylaymanki, biz «Surxon»ga qarshi o‘yinda murabbiy tomonidan berilgan barcha ko‘rsatmalarni bajara oldik. Endi o‘yinni tahlil qilib, keyingi bahsga tayyorgarlik ko‘rishimiz kerak. Gol urganimdan va jamoa g‘alaba qozonganidan xursandman.

Bizda juda yaxshi jamoa bor. Klub rahbariyati tomonidan belgilangan vazifani bajarishda bir-birimizga yordam beramiz.

Barchani ilk g‘alaba bilan tabriklayman, keyingi o‘yinni intiqlik bilan kutaman. Ko‘rishguncha!", — dedi Papariga «Qizilqum» matbuot xizmatiga bergan intervyusida.