Chorshanba kuni «Real Madrid» Ispaniya Futbol Federasiyasi (RFEF) hakamlik qo‘mitasi yig‘ilishida ishtirok etadi. Unda hakamlik tizimini yaxshilash bo‘yicha takliflar muhokama qilinadi.

«Real» ushbu yig‘ilishda klubning bosh direktori Xose Anxel Sanches tomonidan vakillik qiladi. Shuningdek, unda Hakamlar texnik qo‘mitasi (CTA) vakillari Medina Kantalyexo va Klos Gomes, shuningdek, «Betis», «Sevilya», «Fuenlabrada», «Antekera», «Rasing Santander» va «Kosta Adexe Tenerife» klublari ham ishtirok etadi. Yig‘ilishda RFEF prezidenti Rafael Luzan va La Liga prezidenti Xavyer Tebas ham qatnashishi mumkin.  

AS nashrining xabar berishicha, RFEF hakamlik modelini o‘zgartirish imkoniyatini muhokama qilmoqda. Germaniya Bundesligasi va Angliya Premyer-ligasida qo‘llanilayotgan model o‘rganildi. Angliyada hakamlar Professional Game Match Officials Limited (PGMOL) nomli mustaqil tashkilotga tegishli, ammo ularning moliyalashtirilishi Angliya Futbol Assosiasiyasi va Premyer-liga tomonidan amalga oshiriladi. Ispaniyada esa tuzilma jihatdan hakamlar texnik qo‘mita (CTA)ga to‘liq bog‘liq bo‘lib, ularga maoshni ham RFEF, ham La Liga klublari to‘laydi.  

Ispaniyada hakamlar yiliga 265 000 yevro maosh oladi, xalqaro darajadagi hakamlar esa 300 000 yevro dan ortiq daromadga ega. Bu Yevropadagi eng yuqori hakamlik maoshlaridir. Masalan, Angliyada hakamlar 195 000 yevro, Germaniyada esa 190 000 yevro ishlaydi. Ammo shu bilan birga, ispan hakamlari eng kam mustaqillikka ega. Ularning ofislari RFEF qarorgohida joylashgan va ular to‘g‘ridan-to‘g‘ri federasiya rahbariga bo‘ysunadi.  

«Real Madrid» hakamlik tizimidagi o‘zgarishlarni muhokama qilish va hamkorlik qilish uchun yig‘ilishda ishtirok etadi. Klub to‘liq mustaqil hakamlik tizimini qo‘llab-quvvatlaydi va uning RFEF yoki La Ligaga moliyaviy bog‘liqligiga qarshi chiqmoqda.