Чоршанба куни «Реал Мадрид» Испания Футбол Федерацияси (RFEF) ҳакамлик қўмитаси йиғилишида иштирок этади. Унда ҳакамлик тизимини яхшилаш бўйича таклифлар муҳокама қилинади.

«Реал» ушбу йиғилишда клубнинг бош директори Хосе Анхель Санчес томонидан вакиллик қилади. Шунингдек, унда Ҳакамлар техник қўмитаси (CTA) вакиллари Медина Кантальехо ва Клос Гомес, шунингдек, «Бетис», «Севилья», «Фуэнлабрада», «Антекера», «Расинг Сантандер» ва «Коста Адехе Тенерифе» клублари ҳам иштирок этади. Йиғилишда RFEF президенти Рафаэль Лузан ва Ла Лига президенти Хавьер Тебас ҳам қатнашиши мумкин.  

AS нашрининг хабар беришича, RFEF ҳакамлик моделини ўзгартириш имкониятини муҳокама қилмоқда. Германия Бундеслигаси ва Англия Премьер-лигасида қўлланилаётган модел ўрганилди. Англияда ҳакамлар Professional Game Match Officials Limited (PGMOL) номли мустақил ташкилотга тегишли, аммо уларнинг молиялаштирилиши Англия Футбол Ассоциацияси ва Премьер-лига томонидан амалга оширилади. Испанияда эса тузилма жиҳатдан ҳакамлар техник қўмита (CTA)га тўлиқ боғлиқ бўлиб, уларга маошни ҳам RFEF, ҳам Ла Лига клублари тўлайди.  

Испанияда ҳакамлар йилига 265 000 евро маош олади, халқаро даражадаги ҳакамлар эса 300 000 евро дан ортиқ даромадга эга. Бу Европадаги энг юқори ҳакамлик маошларидир. Масалан, Англияда ҳакамлар 195 000 евро, Германияда эса 190 000 евро ишлайди. Аммо шу билан бирга, испан ҳакамлари энг кам мустақилликка эга. Уларнинг офислари RFEF қароргоҳида жойлашган ва улар тўғридан-тўғри федерация раҳбарига бўйсунади.  

«Реал Мадрид» ҳакамлик тизимидаги ўзгаришларни муҳокама қилиш ва ҳамкорлик қилиш учун йиғилишда иштирок этади. Клуб тўлиқ мустақил ҳакамлик тизимини қўллаб-қувватлайди ва унинг RFEF ёки Ла Лигага молиявий боғлиқлигига қарши чиқмоқда.