Ma’lumki, ayni kunlarda Toshkent viloyati Yuqori Chirchiq tumanida zamonaviy futbol infratuzilmasini o‘zida mujassam etishi ko‘zda tutilgan Milliy futbol markazining qurilish ishlari jadallik bilan davom etmoqda. O‘FA rahbariyati boshchiligidagi ishchi guruh qurilish jarayonini yaqindan ko‘zdan kechirish va mas’ullar bilan loyihaning keyingi rejalarini muhokama qilish maqsadida qurilish ob’ektida bo‘ldi.

Markaz tarkibida zamonaviy mehmonxona, futbol mutaxassislarini tayyorlash va ilmiy-tadqiqot markazi, Milliy terma jamoalar uchun tayyorgarlik bazasi, Respublika futbol akademiyasi, sport tibbiyoti va reabilitasiya markazlari o‘rin olishi ko‘zda tutilgan. Ishchi guruh tomonidan qurilish jarayonlarini sifatli, belgilangan muddatda va talab darajasida yakunlash muhimligi ta’kidlandi.

Shuningdek, VAR tizimi uchun maxsus xonalar ajratish, ularni zamonaviy jihozlar bilan ta’minlash hamda raqamlashtirish jarayonlarini tezlashtirish masalalari muhokama qilindi. Futbol sohasini raqamlashtirish va axborot tizimlari yagona kompleksini joriy etish, seleksiya jarayonida inson omillarini qisqartirish hamda xodimlarning ish samaradorligini oshirish bo‘yicha aniq vazifalar belgilandi.

Futbol infratuzilmasining muhim qismi bo‘lgan maydonlarni xalqaro talablarga mos holatga keltirish bo‘yicha tegishli ko‘rsatmalar berildi. Tibbiy va reabilitasiya markazini zamonaviy standartlarga muvofiq tashkil etish va futbolchilar uchun qulay sharoitlar yaratish yuzasidan tavsiyalar berildi. Ishchi guruh tomonidan mas’ullarga tegishli topshiriqlar berilib, kelgusidagi vazifalar belgilab olindi.