Londonning "Chelsi" klubi mish-mishlarga qaramay, "Manchester Yunayted"dan Jeydon Sanchoni sotib olishdan bosh tortmaydi.

Yaqinda tarqalgan ma’lumotlarga ko‘ra, "ko‘klar" ijara davrida o‘zini munosib darajada ko‘rsata olmagani uchun futbolchini sotib olish majburiyatidan voz kechish haqida o‘ylamoqda. Bunday holatda London klubi vingerni qaytarish uchun "Manchester Yunayted"ga tovon puli to‘lashi kerak bo‘lardi. Shunday bo‘lsa-da, insayder Fabrisio Romanoning ta’kidlashicha, bunday bo‘lmaydi - "Chelsi" Sanchoning transferini amalga oshiradi. Bitimni bekor qilish bo‘yicha hech qanday muzokaralar olib borilmadi. Futbolchining o‘zi qolishni istamoqda, "qizil iblislar" ham uning qaytishidan manfaatdor emas.

Jeydon Sancho Enso Mareska jamoasi safida 28 ta o‘yinda maydonga tushib, 2 ta gol va 6 ta golli uzatmaga mualliflik qilgan.