Luka Modrich terma jamoa o‘yini oldidan matbuot anjumanini o‘tkazib yuborishga majbur bo‘ldi.
Xorvatiya terma jamoasi sardori Millatlar Ligasi 1/4 finalidan o‘rin olgan Fransiyaga qarshi o‘yin oldidan jurnalistlarning savollariga javob berishi kerak edi. Biroq 39 yoshli futbolchi ovozidan ayrilgan, u tadbirda ishtirok etishdan bosh tortishiga to‘g‘ri kelgan. Uning o‘rnini darvozabon Dominik Livakovich egalladi.
Qayd etilishicha, bu muammo Modrichning o‘yinda ishtirok etishiga to‘sqinlik qilmaydi. Fransiya va Xorvatiya terma jamoalari o‘rtasidagi uchrashuv 20 mart kuni bo‘lib o‘tadi.
