"Liverpul" hujumchisi Muhammad Saloh klub bilan yangi shartnoma borasida muzokaralarni davom ettirmoqda. Misrlik futbolchining amaldagi shartnomasi kelasi yozda yakuniga yetadi.

Insayder Devid Ornshteynning yangilangan ma’lumotlariga ko‘ra, "qizillar" rahbariyati ijobiy fikrda va yulduzni shartnomasini uzaytirishga ko‘ndira olishiga ishonchi komil.

32 yoshli futbolchining o‘zi ham rejalarini o‘zgartirmadi: u "Liverpul"da baxtli va qolishni afzal ko‘radi. Biroq tomonlar kelishuvning moliyaviy masalalarini hali hal qilmagan.

Manba, shuningdek, jamoaning Chempionlar ligasi va liga kubogidagi so‘nggi muvaffaqiyatsizliklari Muhammad Salohning yakuniy qaroriga ta’sir o‘tkazmasligini ham ta’kidlaydi.