Jahon chempionati saralash uchrashuvlari doirasidagi O‘zbekiston va Eron bahsi 2:2 hisobida yakunlandi. Abbosbek Fayzullayev 52-daqiqada Eron darvozasiga gol urib, milliy jamoa safida kiritgan gollari sonini 8 taga yetkazib oldi.

Bu orqali Fayzullayev Otabek Shukurov va Oston O‘runovlarning natijasini takrorladi. Mazkur natijaga erishish uchun “SSKA” futbolchisiga 25 ta o‘yin yetarli bo‘ldi.

“Persepolis” safida harakat qiladigan O‘runov esa 8 ta gol urish uchun 32 uchrashuvda maydonga tushishi kerak bo‘lgan, Otabek Shukurov esa ushbu natijaga 77 ta o‘yinda erishgan.

Shuningdek, 15-daqiqada Eron darvozasini ishg‘ol qilgan Hojimat Erkinov milliy terma jamoa safidagi 5-golini kiritdi. “Al-Vahda” klubi futbolchisi bu natijaga erishish uchun “oq bo‘rilar” safida 33 ta uchrashuvda maydonga tushish yetarli bo‘ldi.

Eslatib o‘tamiz, O‘zbekiston terma jamoasi Jahon chempionati saralash uchrashuvlarida 17 ochko to‘plab, A guruhida 2-o‘rinni egallab turibdi. Mundial yo‘llanmasini hal qilish uchun jamoaga 1 ochko yetarli.