Madridning “Real” klubi yarim himoyachisi Luka Modrich jamoasi tarkibidagi xorijlik o‘yinchilarning La Ligadagi ishtiroki bo‘yicha ikkinchi o‘ringa ko‘tarilib oldi.

39 yoshli xorvatiyalik futbolchi shanba kungi “Leganes”ga qarshi o‘yinda 81 daqiqa harakat qildi va “Los-Blankos”ning 3:2 hisobidagi g‘alabasiga katta hissa qo‘shganlardan biri bo‘ldi.

Madrid Xtra nashrining xabar berishicha, Modrich Ispaniya chempionatida "Real Madrid" safida 387 ta o‘yin o‘tkazib, braziliyalik sobiq himoyachi Marseloni (386) ortda qoldirdi. Barcha legionerlar orasida faqat fransiyalik Karim Benzema “qirollik” klubi safida ko‘proq o‘yin o‘tkazgan – 439.

Luka Modrich 2012 yildan buyon “Real” sharafini himoya qilib kelmoqda. Faxriyning amaldagi shartnomasi joriy mavsum yakunlanganidan keyin tugaydi.