3 aprel kuni Saudiya Arabistonida start oladigan bu galgi Osiyo kubogi OFK tomonidan 20-bor tashkil etilmoqda. Mazkur musobaqa Qatarda bo‘lib o‘tadigan 17 yoshgacha futbolchilar o‘rtasidagi FIFA Jahon chempionatiga saralash vazifasini ham o‘tab beradi. Musobaqaning eng yaxshi 8 ta jamoasi 2025 yilgi o‘smirlar o‘rtasidagi mundialda ishtirok etish huquqini qo‘lga kiritadi.

O‘zbekiston U-17 terma jamoasi avvalgi turnirlarning 10 tasida (1994, 1996, 2002, 2004, 2008, 2010, 2012, 2014, 2016, 2023) ishtirok etgan va raqiblar darvozasiga 74 ta gol kiritgan. Shuningdek, jamoamiz 46 uchrashuvda 19 g‘alaba, 10 durang va 17 mag‘lubiyat qayd etgan.

Mamlakatimiz ikki bor – 2008 va 2010 yillarda o‘smirlar o‘rtasidagi Osiyo kubogiga mezbonlik qilgan. 2010-yilgi turnirda Aleksey Yevstafeev boshqaruvidagi o‘smirlar jamoamiz finalga qadar yetib borgan va yakunda kumush medallar bilan taqdirlangan. Aynan ushbu turnirda Timur Hakimov eng yaxshi futbolchi va musobaqa to‘purari bo‘lgan.

Ushbu yosh toifasidagi eng katta yutug‘imiz, shubhasiz, 2012 yilda qayd etilgan. Eronda o‘tkazilgan qit’a birinchiligida Dilshod Nuraliyev boshqaruvidagi O‘zbekiston U-16 terma jamoasi g‘oliblikni qo‘lga kiritgan.

2023 yil Tailand mezbonlik qilgan Osiyo kubogida Jamoliddin Rahmatullayev boshchiligidagi O‘zbekiston U-17 terma jamoasi yarim finalga qadar yetib borgan va 11 yillik tanaffusdan so‘ng, U-17 Jahon chempionati yo‘llanmasiga ega chiqqan.