3 апрель куни Саудия Арабистонида старт оладиган бу галги Осиё кубоги ОФК томонидан 20-бор ташкил этилмоқда. Мазкур мусобақа Қатарда бўлиб ўтадиган 17 ёшгача футболчилар ўртасидаги ФИФА Жаҳон чемпионатига саралаш вазифасини ҳам ўтаб беради. Мусобақанинг энг яхши 8 та жамоаси 2025 йилги ўсмирлар ўртасидаги мундиалда иштирок этиш ҳуқуқини қўлга киритади.

Ўзбекистон U-17 терма жамоаси аввалги турнирларнинг 10 тасида (1994, 1996, 2002, 2004, 2008, 2010, 2012, 2014, 2016, 2023) иштирок этган ва рақиблар дарвозасига 74 та гол киритган. Шунингдек, жамоамиз 46 учрашувда 19 ғалаба, 10 дуранг ва 17 мағлубият қайд этган.

Мамлакатимиз икки бор – 2008 ва 2010 йилларда ўсмирлар ўртасидаги Осиё кубогига мезбонлик қилган. 2010-йилги турнирда Алексей Евстафеев бошқарувидаги ўсмирлар жамоамиз финалга қадар етиб борган ва якунда кумуш медаллар билан тақдирланган. Айнан ушбу турнирда Тимур Ҳакимов энг яхши футболчи ва мусобақа тўпурари бўлган.

Ушбу ёш тоифасидаги энг катта ютуғимиз, шубҳасиз, 2012 йилда қайд этилган. Эронда ўтказилган қитъа биринчилигида Дилшод Нуралиев бошқарувидаги Ўзбекистон U-16 терма жамоаси ғолибликни қўлга киритган.

2023 йил Таиланд мезбонлик қилган Осиё кубогида Жамолиддин Раҳматуллаев бошчилигидаги Ўзбекистон U-17 терма жамоаси ярим финалга қадар етиб борган ва 11 йиллик танаффусдан сўнг, U-17 Жаҳон чемпионати йўлланмасига эга чиққан.