Superliga 5-turini «Xorazm» Olmaliqda, 6-turni Toshkentda «Bunyodkor» maydonida o‘tkazadi. Klublar bu masala bo‘yicha o‘zaro kelishib oldi.

Unga ko‘ra, OKMK va «Bunyodkor» rasmiy uchrashuvni reglament asosida tashkil etish bo‘yicha barcha chorani ko‘radi va «Xorazm» klubiga sharoit yaratish ustida ishlaydi. Uchrashuv tashkil etish bilan bog‘liq har qanday kamchilik uchun bevosita OKMK va «Bunyodkor» klublari javobgar bo‘ladi.

Shuningdek, U21 jamoalari ishtirokidagi bellashuvlar uchun ham mazkur kelishuv amalda bo‘ladi. Mavjud holat va sharoitdan kelib chiqib, «Xorazm» U21 — «Bunyodkor» U21 o‘yini 19 aprel emas, balki 17 aprel kuni tashkil etiladi. Bunda «Xorazm» yoshlarining bir safar davomida Olmaliq va Toshkentda uchrashuvlar o‘tkazishi ta’minlanadi.

Ma’lumot uchun, «Xorazm» asosiy tarkibi 13 aprel kuni OKMK va 18 aprel kuni «Bunyodkor» bilan o‘yin o‘tkazadi.